Ávarpið á Austurvelli

Hávaðinn á Austurvelli var ótrúlegur! Hér er ávarpið sem flutt var á undan niðurtalningunni. Bestu þakkir til allra sem komu og höfðu hátt!

 

"Bara örfá orð áður en niðurtalningin hefst. Í dag hófust á Alþingi umræður um Icesave frumvarpið en það er vilji ríkisstjórnarinnar að gera þann ósóma að lögum síðar í dag.  Því verður að mótmæla.

 

Frá því þessi afleiti Icesave samningur var kynntur þjóðinni í byrjun sumars hafa stöðugt komið fram nýjar upplýsingar og sérfræðiálit, og allt hallar það í eina átt:  

 

Samningurinn er afleitur fyrir Ísland, skaðlegur íslenskum hagsmunum og síðast en ekki síst óréttlátur fyrir íslenskan almenning.

 

Enda blasa staðreyndir málsins við: Það finnast engin lög sem segja að þjóðin eigi að axla skuldir einkabanka.

 

Dómstólar hafa líka sagt sitt álit: Sjálfur Evrópudómstólinn felldi dóm árið 2002 í máli númer 222 og sagði þar að það væri beinlínis bannað að ríkistryggja innistæðutryggingasjóð.

 

Þingmenn mega ekki láta hræðsluáróður eða hótanir slæva dómgreind sína.

 

Alþjóðasamfélagið mun ekki útskúfa nokkurt ríki þótt það deili við Bretland eða Holland um peninga. Þó það nú væri.  

 

Stuðningur alþjóðasamfélagsins við málstað Íslands fer stöðugt vaxandi eins og ritstjórnargreinar erlendra stórblaða bera vitni um.

 

 

Stjórnvöld hafa samt allt of lítið gert til þess að halda fram málstað Íslands erlendis. Orkan hefur farið í að karpa um fyrirvara og pína þingmenn til samstöðu um ónýtan samning.

En það er ekki of seint að hafna þessum samningi og gera betri samning.

Þingmenn verða að taka slaginn fyrir Ísland og fella þetta frumvarp!

Nýleg Gallup könnun staðfestir að stór meirihluti þjóðarinnar er á móti þessum samningi. Þjóðin stendur með Íslandi á móti Icesave samningnum. 

Með hverjum ætla þingmenn að standa?

Verkefnið á Íslandi á næstu árum er að byggja upp en það verður miklu, miklu erfiðara ef alþingi samþykkir að leggja 700 til 1000 milljarða skuld á þjóðina ofan á allt annað. Skuld sem við erum ekki í ábyrgð fyrir og samþykktum aldrei.

Að lokum. Markmiðið með þessum mótmælum hér í dag - sem verða mjög hávær - er að andmæla því óréttlæti að þjóðin sé látin borga skuldir fjárglæframanna og einkabanka þeirra. 

 

Þjóðin er búin að taka nóg á sig í þessu hruni.

 

Svo virðist sem of margir þingmenn hafi flotið sofandi að feigðarósi í þessu mikilvæga máli.

 

Við þurfum að vekja þá!  Vekja þá og hvetja til dáða fyrir land sitt og þjóð. 

 

Nú skulum við telja niður saman og vekja þingmenn með ... Hávaða á Austurvelli !!!

 

 

Tíu!  Níu! Átta! ..."

Hávaði gegn Icesave

Athugasemdir

[Rakel Sigurgeirsdóttir, 27.8.2009 kl. 14:10]

Takk fyrir að birta þetta stórgóða ávarp hér

[Heiða B. Heiðars, 27.8.2009 kl. 14:15]

Takk fyrir frumkvæðið. Hávaðinn á Austurvelli í dag var fegursta tónverk sem ég hef heyrt lengi

[Axel Þór Kolbeinsson, 27.8.2009 kl. 14:30]

Ég er ennþá með suð fyrir eyrunum.  (Muna: Kaupa eyrnatappa)

[Reynir Jóhannesson, 27.8.2009 kl. 14:47]

http://qik.com/video/2685356

[, 27.8.2009 kl. 17:34]

Takk fyrir.

[Jón Helgi Egilsson (IP-tala skráð) 27.8.2009 kl. 17:58]

Er í Vesturheimi og ákvað því að öskra í þessu greinarformi. 

Gott framtak Frosti.

[Jóhann Tómas Sigurðsson (IP-tala skráð) 27.8.2009 kl. 21:43]

Glæsilegt Frosti, takk fyrir að birta þetta hér og takk fyrir hávaðan, vonandi vöktuð þið a.m.k. einn eða tvo. Vildi að ég hefði átt kost á að vera á staðnum.

[Þórólfur Ingvarsson, 27.8.2009 kl. 22:43]

Takk fyrir að birta þetta Frosti, Opnar mér leið á sjónum að fá að fylgjast með. Ég leifði mér í gær að setja áskorunina þína um að mæta til hávaðamótmæla á facebook svo þetta færi ekki framhjá vinum mínum í von um stuðning frá þeim.

[Kristján A. Helgason (IP-tala skráð) 28.8.2009 kl. 02:05]

Tek undir með Heiðu. Við hjónin stóðum og lömdum járnstaut linnulaust í nákvæmlega 1 klukkustund sem endaði með því að úr staurnum brotnuðu nokkur stykki, játa ég því hér með spjöll á almannaeign, og er stoltur af því. En í staðinn heppnaðist mér að fá blöðru í lófann sem hélt á hamrinum sem ég barði saklausann járnstautinn með. Járnstautinn má sjá fyrir framan alþingishúsið, lengst til hægri ef þú stendur fyrir framan húsið.

[Jónsi (IP-tala skráð) 28.8.2009 kl. 07:57]

Það er vel við hæfi að næstu mótmæli verði fyrir framan aðalstöðvar Sjálfstæðisflokksins í Vahöll.

Icesave reikningarnir eru alfarið í boði Sjálfstæðisflokksins.

Það á að gera eigur Sjálfstæðisflokksins upptækar og láta þær renna upp  i greiðslur af  Icesave.

Flokkinn á að leggja niður og stofna nýjan flokk með heiðarlegu fólki sem aðhyllist lýðræði og heiðarleika.

[Frosti Sigurjónsson, 28.8.2009 kl. 11:16]

Texti ávarpsins var sendur á alla þingmenn og alla fjölmiðla.

Nokkrir þingmenn stjórnarandstöðu höfðu samband til að lýsa ánægju með framtakið.

Eins vel og til tókst með hávaðann almennt þá varpaði það miklum skugga á aðgerðirnar þegar einhverjir mótmælendur misstu stjórn á sér og gerðu aðsúg að Hannesi Hólmstein. Það var bæði hörmulegt og óafsakanlegt.

Atkvæðagreiðslu var að ljúka á þingi og féllu þannig að 34 sögðu JÁ, 14 NEI, 1 var fjarverandi. Frumvarpið er því orðið að lögum.

Forseti Íslands er vort síðasta hálmstrá. Ég hvet alla til að taka þátt í áskorun til hans um að fella frumvarpið á www.kjosa.is

Á Facebook hafa meira en 17.000 manns skrifað undir áskorun.