Að yfirlögðu ráði og í sátt

Sumar ákvarðanir eru svo mikilsháttar og afgerandi að þær skyldi aðeins taka að undangenginni vandlegri yfirvegun og í samráði við alla sem hlut eiga að máli. Ákvörðunin um hvort sækja skuli um aðild að ESB er einmitt slík ákvörðun.

Hávær minnihluti þjóðarinnar hefur fyrir löngu tekið afstöðu til ESB og virðist telja óþarft að gefa samlöndum sínum ráðrúm til að mynda sér skoðun á málinu. Fyrst skuli sótt um aðild að ESB og svo athugað hvort nokkur sé á móti. Minnihlutinn vill stytta sér leið fram hjá lýðræðinu. 

Það er hinsvegar ekkert sjálfsagt að ganga til samninga við stórveldi um framsal sjálfstæðis þjóðarinnar til þess eins að kanna hvað "okkur bjóðist" í staðinn. Svo illa stödd erum við ekki.

Það er ekkert sjálfsagt að leggja í 500-800 milljóna kostnað við samninga sem þjóðin hefur ekki áhuga á. Hver sem endanleg tala verður eru þetta gríðarmiklir fjármunir sem mætti nota í miklu þarfari hluti. ESB sinnar telja sanngjarnt að deila þessum kostnaði með þjóðinni. Hvaða réttlæti er í því?

Samningar við ESB eru ákaflega mannfrekt verkefni og stendur í langan tíma. Fjöldi manns úr ráðuneytum, ýmsir sérfræðingar og hagsmunasamtök verða kölluð að verkinu. Á sama tíma er gerð sú krafa að margir þessir sömu aðilar leggi nótt við dag við meira aðkallandi verkefni.  Björgun heimila og fyrirtækja landsins þolir enga bið. Það er ekkert sjálfsagt að lama getu okkar til að sinna brýnustu verkefnum með ótímabærri aðildarumsókn.

Það er vel hægt að kanna hvað "okkur býðst" án þess að sækja um aðild. Allir sáttmálar og lög ESB liggja fyrir. Vilji menn vita hvert ESB stefnir á næstunni má lesa það í Lissabon sáttmálanum. Hvað varðar varanlegar undanþágur fyrir Ísland hafa fulltrúar ESB margsinnis sagt að Ísland fái engar meiriháttar undanþágur.

Það er ekki víst að þjóðin vilji ganga í ESB jafn vel þótt varanlegar undanþágur fáist. Í hugum margra snýst þetta ekki um hagsmuni heldur sjálfstæði og sjálfstæði er ekki söluvara.

ESB hlýtur að geta boðið upp á könnunarviðræður án aðildarumsóknar. Í öllum viðskiptum er venja að menn kanni fyrst óformlega hvort það sé nokkur samningsgrundvöllur áður en gengið er til samninga. 

Það vekur reyndar furðu mína og efasemdir um góðan ásetning að ESB skuli taka það í mál að hefja aðildarviðræður við þjóð sem hefur augljóslega ekki tekið málefnalega afstöðu til umsóknar. Þjóð sem er ósammála en knúin í viðræður af háværum minnihluta. Hvað segir þetta okkur um ESB?

Fyrir þá sem eru á móti ESB en treysta algerlega á það að samningur verði felldur í þjóðaratkvæði  þá vil ég benda á að ESB er vel trúandi til að samþykkja þær undanþágur sem þarf til að tryggja rétta útkomu og skjóta innlimun Íslands í sambandið. Eftir innlimum vinnur tíminn með ESB. Í framtíðinni munu án efa koma upp "óheppilegar" aðstæður þar sem hagsmunir Íslendinga felast í því að gefa eftir undanþágur sínar í skiptum fyrir eitthvað sem þá þykir brýnna. Undanþágur eru til trafala fyrir ESB til lengdar. Munum að útganga úr ESB verður ekki í boði hversu illa sem okkur, eða afkomendum okkar líkar.

Það að ganga til samninga er miklu stærra skref en ESB sinnar vilja viðurkenna. Þegar samningar eru hafnir er lestin komin af stað og skriðþunginn er mikill. Allir sem að samningum koma munu keppast við að sannfæra sjálfa sig og aðra að þetta séu bestu mögulegu samningar. Að hafna samningi sem búið er að fjárfesta hundruði milljóna í að undirbúa er ekkert annað en neyðaraðgerð.

Aðeins ein þjóð, Norðmenn, hefur staðist prófið og hafnað aðildarsamningi í þjóðaratkvæði. 

 

Athugasemdir

[Helga (IP-tala skráð) 15.5.2009 kl. 09:03]

Góður pistill hjá þér.

Það er engin tilviljun að Samfylkingin talaði í kosningabaráttunni um "aðildarviðræður" en ekki "formlega umsókn um inngöngu". Þetta var gert til að fólk áttaði sig ekki á því að "formleg umsókn" er undanfari "aðildarviðræðna".

Þvi síður var það tilviljun að frambjóðendur Samfylkingarinnar voru ekki spurðir um kostnað við aðildarviðræður.

Enn er tími fyrir gagnrýna fjölmiðlamenn til að stíga niður úr fílabeinsturni sínum vilji þeir það og setja málið fram á heiðarlegan og gagnrýninn hátt og spyrja fylgjendur ESB-aðildar á þingi hvort þeir geti réttlætt að öllum þessum milljónum jafnvel yfir milljarði króna verði spanderað í viðræður um það sem þú réttilega segir að er hægt að lesa í Lissabonsáttmálanum.

RÚV hefur upplýsingaskyldu ef yfirmenn þar á bæ hafa gleymt því. Og sú upplýsingaskylda er ekki við Samfylkinguna heldur þjóðina.

[Haraldur Hansson, 15.5.2009 kl. 10:35]

Aðeins Norðmenn hafa staðist prófið! Og hvers vegna skyldi það nú vera?

Af því að aðeins Norðmenn hafa gert aðildarsamning við þokkalega heilsu og því ekki verið hægt að beita þjóðina hræðsluáróðri í kreppu og neyð.

Sum ríki hafa gengið inn í pólitískri kreppu: Grikki í kjölfar herforingjastjórnar, Portúgalar og Spánverjar eftir einræðisstjórn og austantjaldslöndin eftir áratuga ok Sovétsins.

Önnur ríki hafa gengið inn í efnahagslegri kreppu: Finnar og Svíar í kjölfar bankakreppu og Bretar í djúpri efnahagslægð í byrjun áttunda áratugarins. Að frátöldum stofnríkjunum hefur ekkert ríki gengið upprétt og heilsuhraust inn í þetta bandalag. Þess vegna liggur ESB svona mikið á að tæla Ísland í klúbbinn á meðan þjóðin er reið, leið og ráðvillt í kreppu. Þá er tækifærið.

[Guðrún Sæmundsdóttir, 15.5.2009 kl. 12:50]

og núna er Alþjóða gjaldeyrissjóðurinn að reyna að brjóta niður sjálfsbjargarviðleytni Íslandinga með að standa gegn lækkun stýrivaxta. Það á greinilega að brjóta landann til hlýðni við Breta og aðrar voldugar ESB þjóðir.

[Óskar (IP-tala skráð) 15.5.2009 kl. 13:30]

Lúpurnar sem eru búin að gefast upp og sjá ekki gullin okkar sem við eigum og mun gera okkur fremst meðal þjóða í seilingarfjarlægð, meiga ekki í aumingjaskap gefa frá okkur okkar stolt og fullveldi.

ég lýsi frat á samfylkinguna fyrir aumingjaskap.

[Gísli G (IP-tala skráð) 15.5.2009 kl. 13:45]

Sæll frændi  

Mikið svakalega er ég sammála þér og fleirum, sendum AGS  heim og klárum þetta sjálf og ekkert ESB kjaftæði

haltu árfam að skrifa á móti þessari vitleysu, alltaf þörf fyrir góða penna í það

Þú ættir kannski að kíkja á  inn.is/svenni  hann er á sömubylgjulengd og þú

kv

GGS 

[Vörður (IP-tala skráð) 15.5.2009 kl. 13:50]

Auðvitað hefði verið betra að ræða þessi mál þegar þjóðin væri í betra jafnvægi en andstæðingar ESB völdu að gera það ekki. 

Aðalástæðan fyrir þessu er sú að ESB andstæðingar, einkum í forustu Sjálfstæðisflokksins hafa í 10 ár brotið hatramlega niður alla uppbyggilega umræðu um ESB aðild.  Það hefur alltaf verið viðkvæðið að það væri ekki tímabært að ræða um ESB núna.  ESB andstæðingar voru þeirrar skoðunar að ekki ætti að ræða aðild að ESB fyrr en góðærið sem tekið var að láni væri liðið hjá.  Nú er sá tíminn kominn upp

Núna er líka í fyrsta sinn stærsti stjórnmálaflokkur á Íslandi með það á stefnuskrá sinni að sækja um aðild, á að hunsa þessi lýðræðislegu skilaboð frá kjósendum?

Það verður líka að virða það að það er skoðun margra að með aðild þá aukast möguleikar okkar til að vinna okkur upp úr þessum vandræðum (sjá http://www.vi.is/files/Endurreisnprint_485135781.pdf) og því er umsókn mjög tímabær
Það væri algert ábyrgðarleysi af hendi Íslenskra stjórnvalda á þessum erfiðu tímum þegar fullveldið hefur tapast í hendur IMF, ef kostir okkar innan ESB væru ekki kannaðir.

Ég held að það sé best að við öndum bara róleg með nefinu.  Aðildarviðræður við ESB taka sinn tíma og auðvitað verður unnið í öðrum málum á meðan. Ef sótt verður um aðild seinna á þessu ári þá yrði aðildarsamningur sennilega ekki tilbúinn fyrr en 2011.  Þessi tími gefur þjóðinni nægjanlegt svigrúm til að meta kostina og gallana við að ganga inn í þetta samband sem við höfum þó tengst svo nánum böndum að við höfum valið að staðsetja okkur innan þeirra landmæra í Schengen samstarfinu.

[Evreka (IP-tala skráð) 15.5.2009 kl. 14:40]

Okkar mestu mistök voru auðvitað að fara ekki inn í ESB um leið og Finnland og Svíþjóð. Þá væri betur komið fyrir okkur í dag, svo mikið er víst.

Þó að aðstæður séu slæmar til að ganga í ESB núna, þjóðin vissulega reið og ráðvillt, þá réttlætir það ekki að við bara bíðum endalaust. Það þýðir ekkert að hætta við þó að samningsstaða okkar sé líklega veikari en hún hefði verið fyrir einhverjum árum síðan.

Þetta þolir einfaldlega ekki lengri bið. Tjónið verður bara meira, ef við ætlum að hika og sjá til í nokkur ár til viðbótar.

Auk þess hljótum við að geta gert fleira en bara eitt verk í einu; við göngum til aðildarviðræðna en vinnum öll önnur mikilvæg verk hér heima samtímis. Eitt verk útilokar ekki annað.

[Haraldur Baldursson, 15.5.2009 kl. 15:24]

Olían er markmið ESB...við munum verða tjúnaðir til í að aðeins eitt mál sé mikilvægt..það verði fiskurinn...ESB leggur síðan á réttum tíma inn tilslökun á þessu eina máli....og við föllum á hélkrók....olían fer framhjá okkur í rúnaðri beygju og við löbbum brosandi með sápustykki inn í sturtuklefann, örugg um að nú sé allt í fína.

[Guðmundur Jónsson, 15.5.2009 kl. 22:17]

Ég þetta frumvarp sem Össur er að leggja fram er frumvarp um landráð. því er engum blöðum um að fletta, þetta eru landráð í skilningi stjórnarárinnar 

Nú er ég ekki yfirlýstur and ESB sinni en ef rétt er að farið þarf 2/3 hluti þingmann að greiða atkvæði með stjórnarskrárbreytingu sem heimilaði svona samninga, svo væri hægt að fara í þetta sem SF er að gera núna. Þessi vinnubrögð sem SF í skjóli VG er að vihafa núna benda til þess finnst mér að þetta fólk er hætt að líta á sig sem íslendinga og ber enga virðingu fyrir stjórnarskránni eða lýðveldinu. 

Góð grein Frosti

[Steinn Magnússon (IP-tala skráð) 15.5.2009 kl. 23:30]

Er þetta  sami ,,háværi minnihluti" og kaus ekki Sjálfstæðisflokkinn, þessi tæpi 80% minnihluti þjóðarinnar?

[Gylfi Gylfason (IP-tala skráð) 16.5.2009 kl. 09:55]

Virkilega fínn pistill og nauðsynlegur. Við verðum að láta í okkur heyra því Samfylkingin hefur efnt til brunaútsölu á lýðveldinu og mega kallast þjóðníðingar fyrir vikið. Dugnaðurinn er enginn, framsýnin er engin og uppgjöf þeirra gegn ríkjandi ástandi er algjör.

[Guðmundur Jónsson, 16.5.2009 kl. 12:03]

Afsaka bullið í mér hér í pósti ofar um 2/3 hluta þingmanna þurfi til að samþiggja stjórnarskrárbreytinga, það er orðnir ártugir síðan ég las yfir stjórnarskránna. Ég laðist í upprifjun á þessu og leiðréttist hér með að það þarf meirihluta þingmanna, þingrof og nýkjörið þing þarf að samþiggja breytingarnar aftur (gr79.).

Ég leifi mér að pósta þessu aftur með leiðréttingum.

XXXXXXXXXXXXXXXXXX

þetta frumvarp sem Össur er að leggja fram er frumvarp um landráð. Því er engum blöðum um að fletta, þetta eru landráð í skilningi almennra hegningarlaga (gr83) og stjórnarárinnar (gr 1. 2. 21.40.47.

Nú er ég ekki yfirlýstur and ESB sinni en ef rétt er að farið þarf hreinan meirihluta þingmanna, þingrof og nýkjörið þing þarf að samþiggja breytingarnar aftur, svo væri hægt að fara í þetta sem SF er að gera núna. Þessi vinnubrögð sem SF í skjóli VG er að viðhafa núna benda til þess að þetta fólk er hætt að líta á sig sem íslendinga og ber enga virðingu fyrir stjórnarskránni eða lýðveldinu.

XXXXXXXXXXXXXXXXXX

[Eiríkur Tómasson (IP-tala skráð) 16.5.2009 kl. 14:19]

Sæll Frosti,

 Mjög góður pistill hjá þér.

Það þarf sannarlega að koma fram réttu upplýsingum um það hvernig þetta fer fram og hvaða þýðingu og afleiðingar trúboðsstefna ESB sinna hefur fyrir þjóðina.

Umræða um þetta þarf að komast á skrið áður en skaðinn verður.

 ET